انا قريت القصة وعجبتني وحبيت تشاركوني فيها


:: الـجــــزء الاول ::

الام:ريــــــــــــــم..ووجع ان شاء الله, يلا الاكل جاهز له اكثر من ساعة وانتي قاعدة قدام هالبلوى اللي تسمونه انترنت..خلاااااااص قومي والله ان عيونك بتنعمي من كثر ما تطالعين بهالشاشة وملزقة وجهك فيها..انا بس ابي افهم وش تطقطقون عليه وش الشي اللي يخليك تقعدين عليه طول هالمدة..اقول قوووومي يله اخلصي وترى والله لو ما قمتي اني لا احرمك منه بالليل ( اليوم اربعاء يعني حرمان الانترنت كانها بتقفل عليهابغرفة بدون اكل او شرب)..
هذي حالة ام ريم مع بنتها كل يوم مطاق وهواش بسبة الانترنت وما صبر الام على بنتها الا انه البنت باقي فيها خير لامها واخواتها..يعني ما تترك صلاة ولو انه بعض الاحيان تأخر صلواتها..ودراستها ماشية تمام يعني علاماتها كويسة..بالنسبة لوحدة مرابطة قدام هالشاشة !!
وصلنا لريم..ريم بنت مملووووحة,عمرها 17 سنة,في ثاني ثانوي !! والكل عارف وش ثاني ثانوي انواااااع التطنيش والوناسة,شعارها في الحياة ( طنش تعش تنتعش ) هي نست مقطع اللي هو وفي النهاية تبتلش,

مرجووووجة الى ابعد الحدود,تحاول باي طريقة انها تصير عربجية على بالها يعني حركة لكن في الواقع ((ماعندها ما عند جدتي)) يعني تخاف من ظلها بس ساعات القوة تجيب معها نتيجة,والاغرب من هذا كللله انها علمي ؟!؟! ((woooooow))
الحين نشوف ريم وش قاعدة تسوي على الانترنت...<<الله من اللقافة
طببببعا اول شي تفتحه ريم اوول ما تشبك هو الشات وتبدا مغامراتها
وطواااالة اللسان شغالة,اول ما تدخل تبدا مطاق مع فلان وتريقة على فلان وقااااالبة هالروم فوق تحت والبنات ما تقرررررب عندهم على بالها مسوية اخلاق وذوق انها ما تأذي بنات جنسها (ايه هين)
ريم: اهليييييييييين شباب وبنات..كيفكم؟؟ هااااه انا متاكدة انكم اشتقتو لي عشان كذا جيت..طبعا هي من اول ما تدخل وهي حااااااااااااااايسة العالم راااااااجة الناس كلهم ما تترك احد الا تضاربه وما يسلم احد من لسانها بس فوق هذا هي تلتزم بحدودها يعني كل الكلام اللي تقوله ما يتعدى المزح والاستهبال..طبعا بعد ما تعبت من كثر ما طقطقت على الكي بورد قررت انها تطلع طبعا مو لله بس لان وراها طلعة من البيت بس قبل ما تطلع كان فيه واحد بنفس الشات يتفرج ويراقب كلام الناس ما لفت انتباهه من كل هالعالم الا ريم..ليه ؟؟ وش الميزة ؟؟ هو نفسه ما يدري الى الحين ايش الشي اللي لفته بهالبنت حاول يكلمها بس طبعا ما عنده الجرأة انه يكلمها مع هالناس والعالم,لانه كان متاكد انها ما راح ترد عليه واذا ردت عليه بتهزئه وبتكرهه بالساعة اللي تكلم فيها..فكر وقال انه بيكلمها برايفيت(خاص)
حاول كم مرة يكلمها وهي كل مرة تسكر قبل حتى لو تشوف الاسم..بس لاول مرة ترد عليه..
قال:السلام عليكم..قالت:وعليكم السلام..قالت:معليييييش اسفة والله لازم اطلع تاخرررررررررت والا بيروحون ويخلوووني اشوفك بعدين بالليل بالليل
هو ما يدري وش السالفة !!!!!!!! بس يكفي انه سمع منها كلمة يعني قالت له بالليل!! يعني عطته فرصة حتى لو كانت تصرفه بس هو يبي يستغل اي فرصة.....طلعت ريم وهي ما تدري اصلا مين هاللي كلمها بس هي ما تنسى اي اسم يمر عليها كان الاسم (يوسف) !! مين هالشخص ؟



يوسف..ولد عمره 23 سنة تقريبا,متخرج وموظف ببنك,وهالانسان ما عنده اي طموح او هدف بحياته,عايش على الروتين,الدوام من الصبح الى العصر يرجع للبيت ياكل وينام الى المغرب,يقوم يقعد مع اهله واخوانه(ما عنده اخوات)..وبعد المغرب على الانترنت يقلب بالمواقع,والشات وينام وهذي حياته..(ما الومه اذا طفش من عمره)..

:: الجــزء الثــاني ::

اليوم: الاربعاء..الساعة:12 بالليل..المكان:بيت ريم..

ريم: اففففففف اخيييييراااا..رجعت البيت..وهالبزران نامو اعوذ بالله ما ينامون الا بالمطاق..

(طبعا الحين ريم بعد ما تأكدت من ان كل اللي في البيت نايمين وخاصة امها..توجهت للكمبيوتر كعادتها وأنتم عارفين وش راح تسوي كالعادة..يلا نشوف)

ريم: اهلييييييين شباب وبنات كيفكم ؟! طبعا مثل ما وعدتكم العصر يعني ما شاء الله علي انا عند وعدي..(وكالعادة نفس المواضيع ونفس الكلام ونفس الحالة)..بس في هالوقت كان يوسف ينتظر على احر من الجمر انه ريم تدخل..شافها..قرا اسمها..مررررة انبسط وراح يكلمها..بس تردد !! خاف ما تذكره..خاف ما ترد عليه..بس بالاخير تشجع وتوكل على ربه وكلمها..

يوسف: السلام عليكم

ريم: اهليييين وعليكم السلام

ريم: اهاااا عرفتك انت اللي اليوم كلمتني وانا كنت بطلع معليش اعذرني..

(يوسف مرررررة انبسط انها تذكرته)
يوسف: ايه انا..لا عادي عاذرك بدون ما تقولين..بس ما كنت متوقع تتذكريني
ريم: افاااا..وش دعوة تراني ريم..لووول
يوسف: والنعم والله بريم..لا يكون ازعجتك او عطلتك عن الشات والناس؟!
ريم: لالا عادي لاحقة على المضارب..اصلا الشات اليوم طفش ما عندهم ما عند جدتي ( طول اليوم بالشات وتقول ما عندهم ما عند جدتي)
يوسف: لا من جد انا ما ابي اسولف معاك وانتي ودك تسولفين معاهم خذي راحتك وانا انتظرك متى ما خلصتي انا موجود..

ريم: يااااخي قلت لك مابي اسولف معهم غصب هو لوووول
(ريم ما تبي تسولف معاه لله بس فيه واحد بالشات تتهرب منه ولا تبيه ينتبه لها مع العالم )..
ريم: لا يكوووون انت ما تبي تسولف معاي بس ودك تلزقها فيني..ترى عادي اعترف..
يوسف: هههههه انا ؟؟ لا والله حرام عليك انا ما ودي اسولف معاك ؟؟ والله ما صدقت بس اتجرأ واكلمك لا والاحلى من هذا انك رديتي علي
ريم: افففف لهالدرجة انا اخوف..اثري اخوف وانا مدري لووول
يوسف:لا والله ما امزح كنت متردد كثييير قبل لا اكلمك..وحاس انك بتهزئيني
ريم:لا وش دعوة ترى انا ملسوووووونة..بس كله مزح ولعب مو اكثر من كذا..

يوسف: ايه مو القصد كذا بس انتي لك هيبة يعني شخصيتك قوية..

ريم: لوووووووول انا شخصيتي قوية ايه هيييييين...بس بس ترى اخذ بنفسي مقلب ويكبر راسي..

يوسف: يحق لك اذا انتي ما شفتي نفسك اجل مين يشوف نفسه ؟!
(ريم ما قدرت تهزئه زي باقي الناس اللي اول ما يقولون كلمة او حتى يلمحون بمدحة لريم قلبت الدنيا على روسهم فسكتت ولا تكلمت)
يوسف قطع السكوت..

يوسف: ريم

ريم :هلا

يوسف :اقولك شي ولا تستغربين ؟؟

ريم:قووول
يوسف: انا صار لي تقريبا اسبوعين وانا اراقب كلامك..ما اقصد الكلمة بمعناها بس اللي اقصده اني اتفرج على كل كلمة تقولينها..وكل تصرف تسوينه..وعرفت انك غير البنات اللي هنا..

ريم: !!!!!!!!!!!!

يوسف: لا تستغربين انا اكلمك جد..يعني انتي الوحيدة اللي ما تتكلمين بالطريقة اللي يتكلمون فيها باقي البنات..حتى اول كم يوم ما صدقت انك بنت كنت متاكد انك ولد..بس الحين تأكدت انك بنت..مهما حاولتي تخفين
انك بنت يبان بين الكلام اللي تقولينه..

ريم: الحييين قاعد تتكلم عني انا !!

يوسف: ايه...مو انتي ريم ؟؟ ههههه
ريم: الا هذا اللي خابرته لوووووول
يوسف: اجل انتي..
ريم: طيب يوسف ممكن سؤال ؟!

يوسف: تفضلي

ريم: الحين انت على قولتك شايف كلامي لك اكثر من اسبوعين..ليه انا ولا مررررررة وحدة شفتك تتكلم مع الناس يعني انا اصلا ما دريت انك موجود الا اليوم؟؟
يوسف:ما عندي الجرأة اني اتكلم بالطريقة اللي تتكلمون فيها..مو لسبب معين ولا لاني اكره المزح بالعكس..انا احب اقرا الكلام واضحك على اشياء معينة..بعدين على فكرة انا ما ادخل بس الشات..ادخل مواقع تفيدني..

منتديات تسليني..يعني اشغل وقتي باكثر من شي..بس انتي مررة لفتي انتباهي وخليتيني اركز على كلامك واتجرأ اكلمك..
ريم تقول بنفسها ( والله اللي موب انا ووجهي)

ريم: اها ما شاء الله اجل موب مثلي اللي ما اصبر اسكت وانا بالشات لازم احوس العالم..لووووول
يوسف:هههههه

(ريم مستغربة من هالولد..يعني مو معقولة يكون كلامه صادق ؟؟
قاعدة تفكر وتقول..هالولد يا انه صااااااادق..او انه شااااطر في اللعب بعقول البنات..والحين جا دوري يلعب علي..ايه نشوف.. يلعب بعقول الناس كلهم الا عقلي انا..انا محد يلعب علي)
يوسف: ريم

ريم: هلا

يوسف:انا عندي اسئلة كثيرة بس ما ودي اسئلها كلها مرة وحدة كاننا بامتحان..ان شاء الله من سواليفنا الااقي الاجابات..

ريم: يووووووه لا تذكرني بالامتحانات..ايه عادي اسئل اللي تبي لكن بحدود..ومثل ما لك الحرية انك تسال لي الحرية اني اجاوب اوكي ؟
يوسف:ايه وش دعوة..بس انا ابي اقولك شي انتي بعد يحق لك تسأليني اللي تبين وبدوووون حدود..
ريم:اوكي..

(سكوووووت ولا احد يتكلم كل واحد ينتظر الثاني يبدا)

ريم:اييييه وكيفك بعد ؟؟
يوسف:تمام..هااه ما ودك تسولفين مع الناس ولا حتى تشقرين عليهم؟
ريم:لووول لا خلاص مدري وش فيني اليوم ما لي خلقهم..اكيد حسدوني
بس على ايش يا حسرة..لوووول
يوسف:ريم..لاحظت شي..

ريم: وشووو ؟؟

يوسف:بالبرايفيت(الخاص) انتي مرررة غير اذا تكلمتي مع الناس..
ريم: غير!! كيف غير
ريم: يوووووووووووه اذذذن لازم اطلع معليش لازم اروح اقوم امي وابوي للصلاة والا صفقوني..

يوسف: ريم لحظة
ريم:لالا اسفة معليش لازم اطلع اشوووووفك بعدين لازم تقولي وش هالشي اللي غير!! مع اني عارفة ان اللقافة بتاكلني من هنا لبكرة

لوووول..

يوسف:هههههه لا بسم الله عليك..
ريم: يله تصبح على خير..ولا تنسى الصلاة

يوسف: وانتي من اهله..ان شاء الله

ريم :بااااااااااااي
يوسف: فمان الله

اتمنى انها تعجبكم