أنا ... والمدام ... والعيــال !!

((الحلقة الأولى))
نفس الميعاد

رغم أني وصلت للبيت في نفس الموعد الذي أصل فيه يوميا إلا أنني لم أسمع في هذه المرة أحلى سيمفونية اعتادت أذني على سماعها في مثل الوقت من كل يوم ألا وهي صوت تــ حمير اللحمة في طاسة القلي .. فقلت لنفسي : لابأس ... وماله . مفيش مانع ناكلها مسلوقة النهاردة ياست شلبية .. أهو برضه أفضل للصحة ونخفف من نسبة الكوليسترول اللي بيحذرنا منه الأطباء ليل ونهار .. وقلت في سري * شكرا يازوجتي الحبيبة على الاهتمام بصحتي .. تصرفك حكيم فعلا .. .. وإن دل هذا على شىء فإنما يدل على حرصها الشديد على صحتنا .. وعندما تم رص الأطباق على الطبلية ، ولم تظهر طاسة اللحمة قلت : ربما يكون قد تم تأخيرها لتكون مسك الختام .. مفيش مشكلة أبداً .. ولكن عندما أوشكت على الشبع ولم تظهر أى بوادر إيجابية تأكد أن طاسة اللحمة لاوجود لها إذا كانت محمرة أو مسلوقة أو حتى نية .. قلت لابأه .. ندخل على الحلقة التانية !!

الحلقة التانية

يمين طلاق !!

انتفضت في ذعر وخبطت الطبلية بإيدي قبل أن أصيح : فين اللحمة ... فين اللحمة ياشلبية ؟؟ فإذا بزوجتي العزيزة ـــ التي لاتهتم إطلاقاً بقراءة الصحف والمجلات ــ ولاتسمع عن جرائد الحوادث ــ تقول لي في هدوء شديد : معلش ياحبيب قلبي .. أعمل إيه . جارتنا اللي كانت بتشتري لنا اللحمة من كرداسة جوزها حلف عليها يمين طلاق ومنعها من زيارة خالتها في كرداسة .. إنت عارف كيلو اللحمة في كرداسة 15 جنيه بس واحنا منقدرش نشتريه من أى حتة تانية .. لأن اللحمة دي أكتر لحمة بتعجبك ياحبيب قلبي ياغالي ، وبتقول عنها دايما وإنت بتبلع الهبر . إنها مسكّرة وعاملة زى الشهد المكرر !!

لم استطع أن اتبين بقية الكلام من زوجتي التي كان واضحا انها لم تسمع حتى هذه اللحظة عن جزارين الحمير اللي اتمسكوا في كرداسة ... ونتج عن كلامها أنني غبت عن الوعي ، وعندما أفقت اكتشفت أني راقد بالمستشفى وحولي كونصلتو من الأطباء ... سألت عما حدث فقالت زوجتي أنها قبل أن تنتهي من كلامها عن لحمة كرداسة كنت قد (( رفصت رفصتين )) ثم رحت في غيبوبة وقال الأطباء أنني مصاب بحالة شحار شديد .. وكل الخوف أن تترك بعض الأثار الجانبية على شكلي الخارجي .. وحواسي الداخلية .. ولذلك كان كل همي بعد سماع هذا الكلام ان أنظر في المرآة فوجدت أن وداني بالفعل كبرت شوية .. وشعر راسي أصبح غزير جداً ، .. وعندما نطقت بأول كلمة تبين أن صوتي أصبح أجش جدا جدا .. وحمدت الله على أن المسألة قد توقفت عند هذا الحد .. لكني عندما أردت إختبار حاسة السمع وفتحت الراديو جاءني صوت ليلى مراد تغني : ياساكني كرداسة " الليلة " في حيكم ... مشتاقة أنا مشتاقة وبموت في لحكمك !!وسحبوني إلى الحلقة التالتة !!

الحلقة التالتة

السحب بالتدريج !!

بصيت في وش مراتي والعيال فلمحت نظرة شماتة مخيفة فقلت لنفسي ساخراً : لاتعايرني ولاأعايرك !! يللي الهم طايلني وطايلك !!.. هو مش كلنا كنا بناكل من اللحمة دي ولا إيه !! :: وقبل ماأكمل كلامي افتكرت أنهم منذ أكتر من شهرين كانوا توقفوا عن أكل اللحمة دي بحجة انهم أصبحوا نباتيين وكنت أنا فرحان جدا بهذا التحول .. اللي خلاني أستأثر بكيلو اللحمة كله بمفردي !! وافتكرت إزاى كانت مراتي بتزغطني اللحمة في بُقي بإيديها اللي هياكلها الدود وهي بتدعي لي بالصحة وطولة العمر !!. آآآآآآآه يابطني ياأمه !!

" حمد الله على السلامة ياأستاذ .. دلوقتي تقدر تمشي " .. هكذا قال لي الطبيب لكي يبشرني بالشفاء .. ثم أكمل قائلا : بس المشكلة الوحيدة إن الجرعة اللي إنت أكلتها كانت شديدة أوي .. حضرتك أكلت ييجي كده مابين عشرين لأربعين حمار !! وطبعا مينفعش نبطلها مرة واحدة .. لازم نسحبها من جسمك بالتدريج علشان ميحصلش انتكاسة لاقدر الله ! وبصراحة كده إحنا محتارين ومش عارفين نجيب لك منين اللحمة .. دي بعد مالحكومة قبضت على الجزارين بتوع كرداسة وشمعت لهم محلاتهم ..

قالت زوجتي بسرعة : متخافش يادكتور .. انا كنت عاملة حساب اليوم ده .. ومخزنة كمية كويسة في الديب فريزر .. كنت محوشاهم لرمضان . فقال الدكتور : أيوه ياهانم بس المشكلة مش مشكلة كيلو ولاإتنين فقالت بسرعة :: عارفه .. عارفه يادكتور .. اطمئن خاااااالص .. الكمية اللي أنا شايلاها تطلع لها كده ييجي حمارين تلاتة بحالهم ... وفي هذه اللحظة فوجئت بنفس الأعراض التي أعاني منها قد ظهرت على وجه الدكتور وإذا به يصرخ بصوت عالي أجش قائلا :: أبوس إيديكو ياجماعة .... أنا وقعت من السما وانتوا استلقتوني .. لايموني على كيلو ولا إتنين .. فقلت ساخراً : هو انت كمان يادكتور مراتك كانت بتخلي جارتها تشتريلكم لحمة لما تزور خالتها اللي في كرداسة ؟؟ ..
فقال بحسرة :: ياريت كانت جت على قد كده .. .... دا أنا مراتي بذات نفسها مولودة ومتربية في كرداااااااسه ... آآآآآآآآآآآه يابطني ياأمه !!
الحقيني ياشلبية !!!!!!!!!!!!


مقال صحفي ... مع بعض التحسينات !!