|
أخوي أبو المزن أو مازن :-
ألف الحمد لله على سلامتك و رجعتك للمنتدى و إنت بألف خير و صحه وعافيه ..
و كل البركة فيك و بأهلك و أحبابك و إنتو أهل السعودية أهلنا و أحبابنا و كذلك كل الخليج و العرب .. ' و عسى الله لا يغيّر علينا ' (( هذي الجملة مقتبسة من الفنان الوسمي سمعته يقولها في مقابلة أعتقد بروتانا ^__^ )) .. رجعنا لسيرة الأخ الوسمي ؟ خخخ دايما نحشر سوالفه و اسمه و سلام العشق بكل شي خخخخ
تفاجأت بالإهداء .. لكن ما هو بشي غريب على أهل الذوق و الكرم ..
و أنا ما سوّيت شي غير واجبي تجاه شخص أعده أخوي الكريم ::
و الكل هنا يشهد بطيبتك و رقيك و الكل كذلك يفخر بأخوتك ..
و ما كان له داعي تكلف نفسك و تعمل لي هذا الإهداء الكبير و الرائع ..
مشكور مليون صرااحه ما قصرت .. و ثانكس واايد على الأغنيتين الحلوات اللي أنا شخصيا أحبهن كثييير ... و خصوصي عاد سلام العشق لها معزه قصدي جنان و إدمان خاااص ^__^ أفرح لي سمعتها أو شفتها (:
و صحيح فيه الكثير من الكلمات الإماراتيه صعبه على الأعضاء الغير خليجيين و هذي الأغنية تعاون جميل بل رائع بين السعودية و الإمارات : بين الشاعر الإماراتي حمد بن سهيل الكتبي و المطرب السعودي راشد الماجد
و شكلي أنا صرت أو رح صير مترجمة المنتدى ^__^ و بالتأكيد أترجم لكم بكل سعادة و سرور ..
لي صاحب خذني بزينه عن كل مزيون ورعبوب
روحي غدت نظرة رهينة والقلب من نظراته يذوب
غض يعيش اول سنينه ومن الدلع له طبع واسلوب
خطر علي ان شفت عينه من نور حسنه امزع الثوب
الشمس في طلعة جبينه والليل وسط العين مسكوب
والخد ينفح ياسمينه مثل الشفق في حزة غروب
عوده شرات الموزلينه فارع ورويان ومسلوب
تكسيه الاوصاف الحسينة ومن المعاني لابس ثوب
قلبي معاه ..ربي يعينه عليه صابر صبر ايوب
مجبور يتحمل ظنينه لو هو غدا بالحب مشغوب
هذي هي معاني كلمات الأغنية للي حاب يسمعها و يستمتع بجمال كلماتها :-
لي صاحب خذني بزينه عن كل مزيون و رعبوب = لي صاحب سحرني بحسنه اللي طغى على كل الحلوين و المزايين ، حيث أن غرشوب = رعبوب = مزيون يعني حلو و جميل و كذلك تقال للناعم أيضا و من المعروف جيدا أن رعبوب اسم يقال للنساء و معناه المرأة بيضاء اللون / البشره
غض يعيش أول سنينه = جميل و رقيق لا يزال في أول سنين عمره يعني صغير السن
خطر عليّ إن شفت عينه = عينه جميله جمال خطير و رهيب
والخد ينفح ياسمينه مثل الشفق في حزة غروب = خده أحمر مثل لون الشفق في وقت الغروب
عوده شرات الموزلينه فارع ورويان ومسلوب = قده أو قوامه جميل مرتب يشبه الموزلينه فارع الطول
تكسيه الاوصاف الحسينة ومن المعاني لابس ثوب = يجمع بشخصه و أسلوبه من كل الأخلاق الحسنة
مجبور يتحمل ظنينه لو هو غدا بالحب مشغوب = مجبور يتحمل حبيبه لو صار مشغول بالحب
ذكرتوني بقصيدة أبوي الشيخ زايد ;( اسمها (مشغوب منك ومشغلني ) ما أقول غير عسى ربي يرحمك و يغفر لك ذنوبك بإذنه تعالى .:.
و بالنهاية أدعيلك دعوة خالصة : عسى ربي يحفظك و يسعدك و يوفقك إن شاء الله بدراستك و يجعلك قرة عين أمك و أبوك و مصدر سعادتهم الدائمة ..
و عسانا ما ننحرم منك و من إهداءتك المبهجة و الفرفوشة كعادتك << هذي مقتبسة من اسمي ( فرفورة )
و اسمحولي ع الإطالة في الكلام و القصور في الواجب
أختكم ،،
فرفورة بنت الإمارات
__________________
 مشاغب = It is nice to be naughty
|