منتديات عاشق لبنان - عرض المشاركة وحيدة

واقعي · 07-19-2007

أكيد الحكاية دي حصلت معانا كلنا ، وهي إننا نبقى حافظين
كلمات أغنية أو مقطع منها بشكل غلط ، ونبقى مش فاهمين المطرب ليه بيقول الكلام الغريب ده

يعنى مثلا وأنا صغير شوية كنت فاكر أم كلثوم بتقول :
كل شيء حلو ف حياتي وانت غايب عن عينيا

وكنت أقعد اقول معقولة هي بتكرهه للدرجة دي ، لدرجة إن كل شيء حلو في حياتها
وهو غايب عن عينيها ، يا نهار اسود ، بقى دي أغنية عاطفية دي .

أتاريها بتقول :
قوللي إيه حلو ف حياتي وانت غايب عن عينيا

وكان أخى اللى اكبرمنى شوووية ، وكان من هواة العزف على العود فى المدرسة ،
ومع ذلك وهو صغير كان يعتقد إن أم كلثوم كانت بتقول :
وابتدى الليل يبقى أطول من سي عبده

وكان أبن أخي الكبير يقول فى نفسه (ياربي مين سي عبده ده اللي طويل قوي لدرجة
إنهم بيضربوا المثل بطول قامته في الأغاني ،
وازاي يعملوا مقارنة بين طول الليل وطول سى عبده )
من كثر ما كان اخى يردد وابتدى الليل يبقى اطول من سى عبده
أصل العيلة عندنا أذكياء خالص .

بينما أم كلثوم براء من هذا وأتاريها بتقول :
وابتدى الليل يبقى أطول من ساعااااااته

حد بئه عنده شجاعه و يعترف بذكائه الحاد زيي كده ولا الكل عباقرة في الاستماع .