مذكرات طفل
انا حسن عمري اربع سنين . وانا الولد البكر لماما وبابا . وعندي اخو عمره سنتين واخت لسه جديدة يمكن عمرها شهرين او شهرين وكم يوم . والله بطلت اعرف احسب مع هالعيلة ....
:???:
اليوم الجمعه . وعن جد نفسيتي كتير تعبانه . يعني اليوم بكيت لقلت بس . ويا ريت في حدا حاسس في . مشان هيك ما لقيت غير اني اكتب مزكراتي . لانه عن جد عن جد . اليوم ما بينتسى .
القصة بدت اليوم بالليل . يعني مش بالليل اخر النهار بالليل اول النهار . يعني قبل ما نصحى بتكون الدنيا ليل . بدت القصة قبل ما نصحى .
انا نمت امبارح وانا حشران . قلت يلا الصبح بعملها . لاني كنت نعسان ومش جاي على بالي اروح على الحمام . صحيت كانت الدنيا ليل وانا كتير حشران . يعني يا دوب قادر اوصل الحمام . وبطلوع الزور كبست على كبسة الضو . بس الضو لمع فجأة وبعدين عمل " بق " وانحرق ! وعاد انا خفت ادخل على الحمام بدون ضو . رحت اركض على حمام ماما . كانت البيبي بتبكي . وبابا بالحمام . يعني شو بعمل بابا بنص الليل بحمام ؟ مش فاهم انا . ليكون قام مشان يصلي ؟ حبكت هلأ يا بابا ؟؟
حاولت امسك حالي كمان شوي . يلا يا بابا .. يلاااااااااااااااااااااا . وبطلت اقدر اتحمل . نزلت ... شو اعمل بس المشكلة اني عزت علي نفسي كتير وصرت ابكي . مش عارف ليش صرت ابكي بس عن جد يعني الواحد ما صدق يخلص من الحفاظات . وما صدق انه صار يعتمد على حاله ويروح على الحمام لحاله اجت الشغلة هاي وخربت الدنيا . ومشان تكمل طلع بابا من الحمام . وشافني مكوم حالي على الارض وببكي . وتقول اني قاتله ابوه . صار يصيح ويغلط علي . ونادى امي اللي تركت البيبي بتبكي واخذتني على حمامها نظفتني وغيرت اواعي وحطتني على سريري . المشكله انه اخوي الصغير " حسان " صحي على صوت ابوي . وبما انه امي لسه عم بتنضفه فهو حافظ كم كلمة " وصار يبرطم " نونو " " فوطه " "دده دده " . عاد انا مش طايق حالي مش ضايل غير ابو شخة يضحك علي !!! المهم رجعت نمت وانا بحلم احلام مزعجة لانه بابا قلي الصبح بورجيك يا حيوان . وبصراحة تمنيت انه الصبح ما ييجي .
الصبح صحيت من النوم كان بابا بيشرب القهوة بالمطبخ وماما بتحضر فطور . كانت عامله وجبتي المفضلة " بيض مسلوق " ورحت عند بابا وقلتله " صباح الخير " بابا ما رد علي . وضل مكشر وقلي " صحيت يا ابو شخة ؟ طبعا انا صرت ابكي على الصبح واصيح " انا مو ابو شخة " " انا مو ابو شخة " " انا كنت خايف من العتمة .
صار بابا يصيح " أخرس وله ! بديش اسمع صوت . انا اللي بحكي عنك زلمة . الله يسم بدنك على الصبح ". ولولا امي هدت الوضع كان قام وضربني .
يعني يا بابا انا شو عملت . سحلت يعني شو اعمل ؟ مو بأيدي . بعدين انا مو زلمة . وعمري ما قلت اني زلمة . انا بيبي عمري اربع سنين بس .مش اربعين – ياه هاد الرقم كتير كبير . كيف بينكتب ؟ - واني اصير زلمة مسألة كتير بعيدة . على العموم بابا ناداني بعد شوي وصار يعطيني محاضرات عن عدم عمل النون بالملابس مرة تانية . وصار يحملني جميلة " مش انا جبتلك لعبة قطار ؟ " مش انا جبتلك بسكليت ؟ " مش ومش . يعني اتمنيت انه ما عمره جابلي اشي .كل ما تصير شغلة بيعيدلي نفس الموال . بعدين هلأ موال جديد لانه ببعتني على الروضة او ال كي جي ون .
انا اكلت بيضيت على الفطور وهاد الكلام يا دوب قبل الصلاة بشوي وبعد الصلاة كانت امي على وشك تجهز الغدا . ويا دوب شوي والا هي حاطه الغدا . وصار بابا ينادي علي اني اجي اتغدا . وراحت كل محاولاتي بأقناعه اني ماكل بيضتين من ساعتين . بس سلامتك خلاني اكل غصب عني ....
صار بطني يوجعني وبابا نازل يدفس . تقول خاروف وبده يذبحه على العيد . ومع اخر لقمة نفضت كل اللي ببطني على ابوي وعلى الارض . خبصت الدنيا . وصرت ابكي وابوي بيسب . وامي بتمسح اواعي ابوي . وانا ببكي وبراجع مع بعض . وكلما صيح في ابوي . اعطيه دفعة . وابكي ....
بعد حفلة الغدا قرر بابا الله يرضى عليه يلطف الجو . وقرر ياخذنا على الحديقة . امي لفت البيبي تقول انها ثروة . وانا لبست الشورت الابيض وبلوزة حمرا . ورحنا نلعب . انا كان عندي بسكليت ازرق بحبه . وحسان كان عنده سيارة سلفر على الكهربا . فلما نزل بابا الاغراض هجمت على السيارة وركبت فيها . ما بدي البسكليت بدي بس السيارة " حسان لا بيقدر يسوق البسكليت ولا السيارة . بس بابا مسكني وقلي هاي سيارة اخوك . روح اركب على البسكليت . حاولت اقاوم بس ما في فايدة . صرت ابكي كمان مرة . بابا المرة هاي ضربني . ضربني حامي على ايدي وعلى ....... . والمشكلة انه بيضربني وبيقلي اخرس . وقف عياط . بديش اسمع صوت . طيب يا زلمة وقف الضرب بوقف العياط . شو هاد ؟؟؟
المهم سكتت . ولعبت على البسكليت . حسان صار يبكي بده بسكليتي . يعني الفرصة اجت اني اركب على السيارة . بس بالله شو ؟ بعد القتلة اعطي حسان اللي بده اياه ؟ ولا حتى يحلم فيها . ما رح اقوم عن البسكليت . بابا اتدخل كمان مرة بالموضوع . يا زلمة حل عنا عاد . احنا بندبر بعض بس انت اطلع منها . وصار يهدي علي " حبيبي اخوك الصغير . حرام خليه يلعب على بسكليتك !! والله يا بابا يا حبيبي انت رح تعملي انفصام بالشخصية !! اذا ركبت على سيارة حسان بتضربني . واذا هو بده بسكليتي بيصير حرام علي امنعه . طب ليش ما جبتلي سيارة زي هاي وانا قد حسان ؟؟؟
في النهاية رضخت للامر الواقع وخليت حسان يركب على البسكليت وصار بابا يجره . انا رحت على السيارة وصرت اسوقها .
في الحديقة في كشك صغير بيبيع اشياء زاكية . والعاب . اخدنا بابا مشان يشتريلنا . انا بدي ايس كريم . طبعا هاي من المحرمات . حاولت كل طرق الاقناع والرجاء . ولما فشلت كلها لجأت لسلاح العياط . بس المرة هاي انا بعرف التكتيك منيح . لازم عياط متواصل بصوت عالي وقدام الناس مشان بابا ما يقدر يضربني . ولازم انا ببكي اصيح بدي ايس كريم .وهيك بابا بيستحي من الناس ومن البياع احسن ما يقولوا حارم ابنه . انا مجربها هاي الطريقة وهي طريقة ناجحة جدا . وزبطت . اكلت الايس كريم بينما حسان بيبكي ورمى التشيبس على الارض . وكل شوي بابا بيخليني الحسه شوي . حتى خلصتها كلها ...
روحنا على البيت . وصارت الدنيا ليل . ماما يا حرام مشغولة بالبيبي . وبحسان . انا نعست وبدي انام بس لازم اشرب حليب . رحت لماما وطلبت حليب . قلتلي استنى شوي بس تفضى . طبعا ما استنيت رحت لبابا . صار يتأفف مشان ما بيحب يقوم يعمل الحليب . قال لي استنى شوي ماما هلأ بتعملك . بصراحة ما اعطيتهم فرصة بديت ابكي !! وبصوت عالي . الدنيا ليل بابا ما رح يضربني . ماما صارت تصيح ببابا انه يقوم يعملي الحليب . بابا صار يصيح فيها مشانها بنصيح فيه . وانا ببكي . اخرتها قام بابا عملي الحليب . ومسكني وزتني على التخت . انا طبعا سكتت ولما طلع من
الغرفة . طفى الضو . صرت ابكي كمان مرة بس المرة هاي بدلع . ضوا بابا الضو . وصاح في : مالك ؟؟؟؟ قلتله : خلي الضو مضوي !!!! مش عارف شو سب . بس يمكن على الخلفة واللي بيخلفوها ..........